ភ្នំពេញ៖ នៅព្រឹកថ្ងៃទី២៥ ខែសីហា ឆ្នាំ២០២៣ កងកម្លាំងបានបញ្ជូនជនសង្ស័យចំនួន ១១នាក់ដែលពាក់ព័ន្ធការរំដោះទណ្ឌិតជនជាតិចិននៅខេត្តសៀមរាប ទៅសាលាដំបូងរាជធានីភ្នំពេញ។

អ្នកនាំពាក្យមន្ទីរប្រឆាំងគ្រឿងញៀន លោកឧត្តមសេនីយ៍ត្រី អ៊ិន សុង បានថ្លែងប្រាប់ EAC ថា ក្នុងចំណោមជនសង្ស័យទាំង ១៣នាក់ គឺ១១នាក់ត្រូវបានបញ្ជូនទៅសាលាដំបូងរាជធានីភ្នំពេញ ហើយជនសង្ស័យជនជាតិខ្មែរ២នាក់ដែលទើបតែចាប់បានកាលពីថ្ងៃទី២៣ ខែសីហា អាជ្ញាធរកំពុងកសាងសំណុំរឿងបញ្ជូនទៅតុលាការនៅពេលក្រោយ ដោយបច្ចុប្បន្នកំពុងស្ថិតនៅនាយកដ្ឋាននគរព្រហ្មទណ្ឌនៃអគ្គស្នងការដ្ឋាននគរបាលជាតិ។

បើតាមអ្នកនាំពាក្យមន្ទីរប្រឆាំងគ្រឿងញៀន ជនសង្ស័យទាំង ១៣នាក់នោះអាចនឹងរងពីបទ «ប្លន់អ្នកទោស» និងបទពាក់ព័ន្ធការជួញដូរគ្រឿងញៀន។

លោកបន្ថែមថា បច្ចុប្បន្នអាជ្ញាធរកំពុងតែស្រាវជ្រាវ និងតាមចាប់អ្នកពាក់ព័ន្ធនឹងករណីរំដោះអ្នកទោសបន្ថែមទៀត ខណៈអាជ្ញាធរចាប់បានឧក្រិដ្ឋជនសរុបចំនួន១៣នាក់ ក្នុងនោះមានជនជាតិចិនតៃវ៉ាន់ ខ្មែរអាមេរិក តួកគី និងជនជាតិខ្មែរ៕